सर्वोच्चबाट फिर्ता लिए बन्दी प्रत्यक्षीकरणको रिट ‘भीआईपी जुवाडे’हरुले

200
Loading...

काठमाडौं– गत आइतबार जुवा खेल्दाखेल्दै काठमाडौं महाराजगञ्जबाट पक्राउ परेकामध्ये १४ जना ‘भीआईपी जुवाडे’हरुले सर्वोच्चमा दायर गरेको बन्दी प्रत्यक्षीकरणको रिट फिर्ता लिएका छन् ।

आफूहरुलाई गैरकानूनी रुपमा थुनामा राखेको प्रमाण पुर्‍याउन नसकेको भन्दै १४ जनाहरुले शुक्रबार सर्वोच्च अदालतबाट बन्दी प्रत्यक्षीकरणको रिट फिर्ता लिएका हुन् ।

प्रहरीले गत आइतबार काठमाडौंको महाराजगञ्जबाट २५ जनालाई २ करोड ६७ लाख नगदसहित जुवा खेल्दाखेल्दै पक्राउ गरेको थियो ।

पक्राउ परेकामध्ये ६ जनाले पक्राउ परेकै दिन आइतबार दिउँसो सर्वोच्च अदालतमा बन्दी प्रत्यक्षीकरणको रिट दायर गरेका थिए । अन्य ८ जनाले बुधबार अदालतमा रिट दायर गरेका थिए ।

अदालतले बन्दी प्रत्यक्षीकरणको रिटमाथि सुनुवाई गर्दै उनीहरुलाई अदालतमा उपस्थित गराउन भनेको थियो । अदालतको आदेशानुसार प्रहरीले रिट दायरकर्तालाई सोमबार, मंगलबार, बुधबार र बिहीबार समेत अदालतमा उपस्थित गराएको थियो ।

तर, शुक्रबार अदालतमा हाजिर हुने समयमा उनीहरुले रिट फिर्ता गर्ने निवेदन दिएका हुन् ।

प्रहरीले घटनाको अनुसन्धान गरी जिल्ला प्रशासन कार्यालय काठमाडौंमा मुद्दा दर्ता गर्ने तयारी गरेपछि पक्राउ परेकाहरुले बन्दीप्रत्यक्षीकरणको रिट दायर गरेका हुन् ।

प्रहरीले बिहीबार मात्रै २५ जनालाई जिल्ला प्रशासन कार्यालय काठमाडौंमा उपस्थित गराएको थियो । प्रशासन कार्यालयले उनीहरुमाथि अनुसन्धानका लागि ७ दिनको म्याद थप गरेको थियो । थपिएको म्याद पक्राउ परेको दिनदेखि लागू हुने भएका कारण उनीहरुविरुद्ध थपिएको म्याद शनिबार सकिँदै छ ।

प्रहरीले अब उनीहरुलाई आइतबार प्रशासन कार्यालयमा उपस्थित गराउने छ ।

Loading...